Wednesday, November 6, 2013

..عن علاقات ملهاش اسم

هو: سينظر إليكِ نظرات بمعنى و بلا معنى، سيكلمك بسبب و بدون سبب، سيسألك عما تفعلينه، و ما فعلتيه و ما تنوي فعله في يومك، سيهتم..و يكون هو-بهذا الاهتمام غير المسبوق بأحداث يومك العادية- بطل اليوم و كل يوم... سيسألك عن حياتك و أحلامك، سيبتسم و "يتنحنح" و "يتسنتح" و هيعطف و يلطف..سيهتم بمعرفة أصدقائك (ليس عائلتك) و علاقاتك بل و يستجوبك عنها.."مين ده و مين دي" و كده

هي: ستعلن دفاعاتها عالية، هي تقيلة، و "مش أي حد هيحبها هتحبه يعني" الجملة ال"حمضانة" الغير حقيقية و غير واقعية لأنه مين قال أساساً إنه بيحبك، و لأنه الاهتمام فعلاً هو اللي جذبك..
المهم، هتألف ميت سيناريو في دماغها، هتفكر أما "يجي يقابل بابا" و يمكن تجهز الفستان اللي هتلبسه يومها كمان..هتعتبر تدخّله و تطفّله على حياتها و تحكمه الغير مبرر و الغير مفهوم "غيرة و حب" و هتعتبر عدم وضوحه في شكل و طبيعة العلاقة أدب و أخلاق أنه "ميعشمهاش" أو "ميوعدهاش بحاجة" و هو مش جاهز يجي تاني يوم الصبح..

هي هتحبه، أو هتتعلق بيه، هتفكر فيه و هتحترم غيابه قبل وجوده، هتحكي لكل صاحباتها، و جيرانها و يمكن عم محمد البواب عشان ميشكش لو جه وصلها.. هي هتعلق الأمل، كل الأمل بل كل التأكد إنه هيتكلم و إنه هيفههما في الوقت المناسب.

هو: هيفكر فيها ساعات، لكن كل ما هيفكر هيكلمها، مش هيفكر و يدكن زيها، هيبقى متخيل إنه اللهو الخفي، و إنه طالما مقالش حاجة صريحة يبقى كأنه مش موجود أو كأنه بيتعامل معاملة إنسانية عادية..هيبقى عايز يكلمها أي وقت، و يتدخل في حياتها بأي شكل..لكن هي أول ما تبتدي تاخد نفس الدور، أول ما تبتدي تهتم التحدي هيقل، و اهتمامه هو هيقل، هتبقى هي اللي بتجري وراه (سبحان الله) هيخاف..هيخاف من المسئولية، هيخاف "يتدبس"، هيخاف يتخنق، لأنه بيحب نفسه أكتر منها، و لأنه مش مستعد و مش هيبقى مستعد "anytime soon " هيفكر إنه كده كده مقالش حاجة، و إنه يا دار ما دخلك شر، و هيبتدي "يخلع"..

ملهاش تعبير غير كده، هيخلع، هيجيب ورا، مش هيرد و مش هيسأل، و مكانك دلوقتي و روّحتي و لا لأ و كلتي ايه و أصحابك مين مش هتبقى حاجة مهمة " "anymore

هي: هتقول عليه مشغول، أو هتقلق لا يكون حصله حاجة، هتلوم نفسها و تراجع كل كلمة قالتها و كل تصرف و كل نظرة، لا تكون زعلته أو اتعلقت زيادة و خنقته...
هو هيمشي من سكات، و هي هتسأل نفسها ميت مرة في اليوم اللي حصل ده كان اسمه ايه، علاقة عابرة؟ حب؟ إعجاب؟ صداقة؟ و لا تهيؤات؟

مش هتعرف تلومه لأنها أضعف من اللوم و لأنه فعلاً "ميتمسكش عليه حاجة"..

هيخرج زي ما دخل..مش واضح و مش مريح و مش...راجل.

3 comments:

  1. أو مش مهم
    الوصف ده قريب جدا لعلاقاتي الشخصية ومن الناحية بتاعتي إن التعريف نفسه مش مهم والله العظيم مش مهم

    ReplyDelete